مرامنامه
باخیش:
"ایران اوچون دییرمی میز" ایرانلی‌لاری و ایرانلی-آمریکالی‌لاری آمریکانین هر طرفینده بیر یئره ییغیب اونلارین اوجا سسی اولماغا چالیشیر.
مقصد:
"ایران اوچون دییرمی میز" بوتون ائتنیک قروپلار و ملیت‌لری او جومله‌دن آذربایجان تورک‌لری، فارس‌لار، عرب‌لر، کوردلر، بلوچ‌لار، تورکمن‌لر و ئوز وطنلری ایرانی استبداددان آزاد گورمک ایسته‌ین باشقا آداملاردان تشکیل اولان ایرانلی-آمریکالی‌لارین اعتلافی دیر. بو تشکیلات ایراندا قانون حاکمیتی، آزادلیق و دئموکراسی‌یه چاتماغی تبلیغ ائتمک و آمریکادا ایرانلی-آمریکالی‌لار اجتماعیتی‌نین منافعینی ایره‌لی آپارماق اوچون الینده اولان بوتون ایمکانلاردان استفاده ائدیر.
اجرائی هدفلر:
"ایران اوچون دییرمی میز" حاقلارین تبلیغی و تعلیم-تربیه مقصدی ایله، داها دقیق دئسک ایرانلی‌لارین و ایرانلی-آمریکالی‌لارین اقتصاد، فرهنگ، و اجتماعی حیاتین ایره‌لی آپارماق اوچون یارادیلیب و بوتون اجتماعیتی احاطه ائده‌ن بیر اعتلافی یا دا موجود اولان تشکیلاتلارین اعتلافینی قورماق، ساخلاماق و حمایه ائتمکدن عبارتدیر.
ئون سؤز:
ایران معاصر تاریخده، بیر نئچه مین ایل قاباقجیل تمدن‌لرین بئشیکی اولوب.
بیر نئچه یوز ایل بو تورپاقدا فرقلی دینلر و ملیت‌لرین نوماینده‌لری او جومله‌دن فارس‌لار، آذربایجان تورک‌لری، کوردلر، بلوچ‌لار، عرب‌لر، و تورکمن‌لر بیرلیکده و بیر-بیرینه قارشی دؤزوم و حؤرمتله یاشاییبلار. لاکن بوگون ایران و اونون خالقلاری دئموکراسی، آزادلیق، و اجتماعی عدالتین اولماماسیندان، ائله‌جه ده بیری بیرینین آردینجا گلن دیکتاتورلوق رژیملرینین یاراتدیقلاری درین داخلی بؤحرانلارین سبب اولدوغو شرایطه گؤره، صولحون اولماماسیندن و انسان حاقلارینا حؤرمت ائدیلمه‌مسیندن عذاب چکیرلر.
بیر طرفدن گوج و صلاحیتین حدیندن چوخ مرکزه ییغیلماسی و وطنداشلارین حاقلارینا حؤرمت ائدیلمه‌مسی ئولکه‌نین سرحدلرینده یاشایان خالقلارین یادلاشمالارینا و دیکتاتورلوق رژیملرینین یارانماسینا و ییخیلان رژیملرین یئنیدن اوزه چیخماسینا گتیریب چیخاریب. دیگر طرفدن ایرانین تاریخی، هئچ اولماسا سون یوز ایلده گؤستریر کی دئموکراسی و آزادلیق ایران خالقلارینا یاد دئیل.
2001-ینجی ایل سپتامبرین 11-ینین کدرلی حادثه‌سی دونیا اجتماعیتی‌نین او جومله‌دن آمریکانین یاخین شرق و اونون دؤولتلرینه قارشی سیاستی‌نین ده‌ییشمه‌سینه سبب اولدو. آمریکانین خارجی سیاستی‌نین اوزون مدتلی منفعتی منطقه‌ده صولح و ثابتلیگین تأمین اولونماسینا آرخالانیر. یاخین شرق خالقلاری او جومله‌دن ایران خالقلاری آمریکادا بو یئنی دوشونجه‌نی رغبتله قارشیلاییر.
دیکتاتورلوق آلتیندا اولان یاخین شرق دؤولتلری او جومله‌دن اسلام جمهوریتی آلتیندا اولان ایران منطقه‌نی بوروین ده‌ییشیکلیک کوله‌گینین تأثیرینی حیس ائدیرلر. اونا گؤره ده منطقه خالقلارینین آرزولارینی عکس ائتدیره‌ن بو ده‌ییشیکلیک‌لری حمایه ائتمک بین‌الخالق اجتماعیتین و آمریکانین خیرینه‌دیر.
ایران اوچون دییرمی میز آمریکانین ائله بیر خارجی سیاستی‌نی حمایه ائدیر کی، او دئموکراسینی، انسان حاقلارینا حؤرمت ائدیلمه‌سینی، قادین حاقلاری و جینسی برابرلیگین، ائله‌جه ده، وطنداش حاقلاری و سیاسی آزادلیقلارین تأمین ائدیلیب قورونماسینی، و بیرلشمیش میلتلر تشکیلاتی‌نین خارتیاسی‌نین بین‌الخالق عالمده تانینمیش ستاندارتلارینا و اونون باشقا مربوط کونوئنسیالارینا اویغون اولاراق قانون حاکیمیتی‌نی تبلیغ ائدیر.
ایران اوچون دییرمی میز اجتماعی-اقتصادی، سیاسی، فرهنگی مسئله‌لر، قادین حاقلاری، ائتنیک قروپلار، امنیت مسئله‌لری، و ایران ائله‌جه ده بوتون دونیایا تأثیر ائده‌ن باشقا مسئله‌لر باره‌سینده دقیق معلوماتلار یاییر، تحقیقات و آراشدیرمالار آپاریر، ایراندا وطنداش جمعیتی قورماغا چالیشیر، همچینین ایراندا مختلف ملیتلر آراسینداکی رابطه‌لری محکملندیرمگه، ایران خالقلاری و آمریکا خالقی آراسیندا دوستلوق، آنلاییش، و امکداشلیغی تشویق ائتمگه چالیشیر، و بورادا معین اولونان مقصدلره اویغون باشقا فعالیتلر آپارا بیلر.
"ایران اوچون دییرمی میز" حاقلارین تبلیغی و تعلیم-تربیه مقصدی ایله، داها دقیق دئسک ایرانلی‌لارین و ایرانلی-آمریکالی‌لارین اقتصاد، فرهنگ، و اجتماعی حیاتین ایره‌لی آپارماق اوچون یارادیلیب و بوتون اجتماعیتی احاطه ائده‌ن بیر اعتلافی یا دا موجود اولان تشکیلاتلارین اعتلافینی قورماق، ساخلاماق و حمایه ائتمکدن عبارتدیر.
ایرانلی‌لارین و ایرانلی-آمریکالی‌لارین غیرسیاسی و طرفسیز تشکیلاتی اولان ایران اوچون دییرمی میز بونا اینانیر کی، اسلام جمهوریتی دینچی دیکتاتورلوق رژیمیدیر و منطقه‌ده، ائله‌جه ده، بوتون دونیادا صولح، ثابیتلیک، و امین-آمانلیق قارشیسیندا بیر مانعه‌دیر.
ایران اوچون دییرمی میز دئموکراتیک ده‌ییشیکلیک‌لره، و بیرلشمیش میلتلر تشکیلاتی‌نین معاهده‌لرینده، بین‌الخالق قانونلاردا، و بیرلشمیش میلتلر تشکیلاتی‌نین انسان حاقلاری بیاننامه‌سینده یازیلان فردی و اجتماعی حاقلار و آزادلیقلاری تأمین ائده‌ن قانون حاکیمیتینه اساسلانان دئموکراتیک بیر دؤولتین قورولماسینا چاغیریر.
ایران بیر چوخ ائتنیک قروپلاری اولان بیر اجتماعیتدیر، اونا گؤره ده، پلورالیستیک و فدرال بیر ایرانین آزاد، دئموکراتیک و بیرلشمیش بیر ئولکه کیمی پارلاق گله‌جگی اوچون میلیتلرین حاقلارینین تأمین اولوناسی واجبدیر.
-